सामसुङका मोबाइल अमेरिकामा प्रतिबन्धित हुने

दक्षिण कोरियाली प्रतिस्पर्धी कम्पनी सामसुङ

विरुद्धका दुइ महत्वपूर्ण बौद्धिक सम्पत्ति सम्बन्धि मुद्दामा अमेरिकी कम्पनी एप्पलले जित हात पारेको छ । अमेरिकी अन्तराष्ट्रिय व्यापार आयोगमा चलेको यी दुइ बीचको मुद्दामा एप्पलले जित हात पारेको हो ।अमेरिकी अन्तराष्ट्रिय व्यापार आयोग युएस आइटीसीले सामसुङद्वारा मोबाइल फोन, मिडिया प्लेयर तथा ट्याब्लेटको उत्पादनको क्रममा एप्पलको महत्वपूर्ण दुईवटा बौद्धिक सम्पत्तिको उल्लंघन भएको भनि सन् २०११ मा गरेको निर्णय सदर गरेपछि एप्पल उत्साहित बनेको छ ।

साथै आयोगले एप्पलको बौद्धिक सम्पत्ति चोरेको ठहरिएका सामसुङका उत्पादनलाई अमेरिकामा प्रतिबन्ध लगाउन समेत निर्देशन दिएको छ । यद्यपि आयोगको यो निर्देशन तत्काल कार्यान्वयन भने आउने छैन । आयोगको फैसलामाथि अमेरिकी राष्ट्रपतीले पुनर्विचार गर्न सक्नेछन् । ६० दिनभित्रमा राष्ट्रपतिले आयोगको फैसला सदर गर्ने वा उल्टाउने भन्ने कुराको निर्णय गर्नुपर्नेछ । यद्यपि ओबामाले आयोगको फैसला उल्टाउने सम्भावना नरहेकोले सामसुङका केही उत्पादनहरु अमेरिकामा प्रतिबन्धित हुने सम्भावना रहेको विश्लेषकहरुले बताएका छन् ।

यता अमेरिकी अन्तराष्ट्रिय व्यापार आयोगको फैसलाप्रति सामसुङले आपत्ति जनाएको छ । एप्पलका दुइ बौद्धिक सम्पत्तिका आधारमा आयोगले गरेको निर्णयले हामीलाई निराश बनाएको छ’ सामसुङको विज्ञप्तीमा भनिएको छ । स्मार्टफोन उद्योगको मुख्य ध्येय विश्वव्यापी कानुनी युद्ध नभएको भन्दै सामसुङले बजारमा स्वस्थ प्रतिस्पर्धा हुनुपर्ने जनाएको छ । उता एप्पलले भने फैसलाको स्वागत गरेको छ । एप्पललका आविष्कार चोर्ने सामसुङको कामलाई आयोगले खारेज गरेको एप्पललको भनाइ छ ।एप्पलको बौद्धिक सम्पत्तिको अधिकारका रुपमा रहेको टच स्कृन प्रविधि र अडियो सकेट सामसुङले आफ्ना ग्याजेटमा नक्कल गरेको ठहर आयोगले गरेको छ ।

तथापि एप्पलका अन्य ४ वटा दाबी भने प्रमाणित हुन सकेनन् । स्मरण रहोस् एप्पल र सामसुङबीच पछिल्लो समय बौद्धिक सम्पत्ति अधिकारको लडाइँ निकै चलिरहेको छ । यस विषयमा दुइ कम्पनीबिच विश्वका १० देशका विभिन्न अदालतमा मुद्दा चलिरहेको छ । अघिल्लो वर्ष विश्व स्मार्टफोन उद्योगमा सामसुङले एप्पललाई उछिनेपछि यी दुइबीचको बौद्धि सम्पत्ति अधिकारको लडाइँ झनै चर्किएको हो ।